Lín

Þegar menntaskóla lauk heiminn vild‘ ég sjá

og læra meira í leiðinni, en lán ég varð að fá.

Til að sækja um lán hjá LÍN í Borgartún ég fór,

þau lofuðu mér peningum en dýran eið ég sór.

Við vösk erum til vinnu og segjum aldrei nei

og ég mun ná að borga þetta áður en ég dey.

Þegar loksins út ég kom, það var ekkert grín,

skólagjöldin fyrirfram, en ekkert fékk frá LÍN.

Þú lánið færð í janúar og ef þú ekkert átt,

þú þarft að fara í Arion og fá þér yfirdrátt.

Við vösk erum til vinnu og segjum aldrei nei

og ég mun ná að borga þetta áður en ég dey.

Yfirdráttarholuna ég stöðugt dýpra gróf,

en lifði æ í voninni um lánið eftir próf.

Við að horfa á innkaupin, hluti af mér deyr,

mér er sama ef ég sé núðlur aldrei meir

Við vösk erum til vinnu og segjum aldrei nei

og ég mun ná að borga þetta áður en ég dey.

Prófin búin, öllu náð en engan pening sé,

staðfesting‘ á skólavist ég láta verð í té.

Staðfestingin loksins barst en féll þeim ekki í geð,

þau sögðust verri leturgerð aldrei hafa séð.

Við vösk erum til vinnu og segjum aldrei nei

og ég mun ná að borga þetta áður en ég dey.

Loksins þegar lánið barst var það mikið skert,

úthlutunarreglunum þau breyttu töluvert.

Svo aum var blessuð upphæðin, ég fékk í hálsinn kökk,

varla fyrir vöxtunum af yfirdrætti hrökk.

Við vösk erum til vinnu og segjum aldrei nei

og ég mun ná að borga þetta áður en ég dey.

Ég rekin(n) var úr skólanum því borgað ekki gat,

ég neyðist til að selja mig svo eigi fyrir mat.

Húsið hennar mömmu í yfirdráttinn fauk

og hún bjó á götunni þar til yfir lauk.

Við vösk erum til vinnu og segjum aldrei nei

og ég mun ná að borga þetta áður en ég dey.

Við vösk erum til vinnu og segjum aldrei nei

og ég mun ná að borga þetta áður en ég dey.

Ég mun pottþétt borga þetta áður en ég dey,

ég borga lánið þúsundfalt áður en ég dey,

ég þarf selja úr mér nýrað áður en ég dey,

ég verð tekin(n) upp í skuldir áður en ég dey,

ég drepst við að borga þetta…

….áður en ég dey!