För

Ég vil að þú vitir að sannur ég er,

vil að þú vitir ég er handa þér.

Ef þú velkist í vafa og vissan er rýr,

vísan er svarið, kveðskapur hlýr.

Langt er nú síðan við lögðum af stað,

þú leiddir mig áfram. Hvað varð um það?

Langt er nú síðan við lögðum af stað,

þú leiddir mig áfram. Hvað varð um það?

Eitt er að elska og annað að þrá.

Eitt er að eyða og annað að sá.

Ef hugur þinn strandar við klettótta strönd,

strandhögg ég ræðst í og rétti þér hönd.

Langt er nú síðan við lögðum af stað,

ég leiði þig áfram, viljirðu það.

Langt er nú síðan við lögðum af stað,

ég leiði þig áfram, viljirðu það.

Fræjum við þeyttum í frjósaman svörð,

í félagi stöndum um afkvæmin vörð.

Frjóin þó hverfi og fljúgi á sveim,

við feykjum þeim aftur og jafnharðan heim.

Ég vil að þú vitir að sannur ég er,

ég vil að þú vitir ég er handa þér.

Langt er nú síðan við lögðum af stað,

nú leiðumst við áfram, þannig er það.

Þó langt sé nú síðan við lögðum af stað,

nú leiðumst við áfram, þannig er það.