Komdu inn í kofann minn

Komdu inn í kofann minn,

er kvölda’ og skyggja fer.

Þig skal aldrei iðra þess

að eyða nótt hjá mér.

Við ævintýraeldana

er ýmislegt að sjá,

og glaður skal ég gefa þér

allt gullið, sem ég á,

tíu dúka tyrkneska

og töfraspegla þrjá,

níu skip frá Noregi

og naut frá Spáníá,

austurlenskan aldingarð

og íslenskt höfuðból,

átta gráa gæðinga

og gylltan burðarstól,

fjaðraveifu fannhvíta

og franskan silkikjól,

eyrnahringi, ennisspöng

og alabasturskrín,

hundrað föt úr fílabeini

full með þrúguvín

og lampann, sem að logaði

og lýsti Alad dín,

Komdu inn í kofann minn,

er kvölda’ og skyggja fer.

Alltaf brennur eldurinn

á arninum hjá mér.

Eg gleymdi einni gjöfinni

og gettu hver hún er.

Ég gleymdi einni gjöfinni,

ég gleymdi sjálfum mér.

cord-image